Baixo custodia do Estado ata que remate o xuízo os bens de Meirás que reclama a familia de Franco

O maxistrado titular do Xulgado de Primeira Instancia N.º 70 de Madrid acordou a adopción da medida cautelar solicitada pola Administración Xeral do Estado e o Consello de Administración do Patrimonio Nacional e decretou que os bens identificados na demanda, que se atopan situados no interior do Pazo de Meirás, queden en depósito baixo a custodia do Estado ata que se poña fin ao preito.

A Administración do Estado e Patrimonio Nacional solicitaran que os bens quedasen dentro do  Pazo de Meiras e en depósito da Administración ata que os tribunais resolvan quen é o seu verdadeiro dono.

Esta é unha medida cautelar que a Abogacía do Estado consideraba "esencial" para garantir a conservación dos 564 bens que reclama a familia do ditador. Son bens de Patrimonio Nacional e Documental e tamén hai outros que son de dominio público. 

A esta petición tamén se adheriran a Xunta de Galicia e o Concello de Sada. Precisamente o auto recolle que "no acto da vista, concedida a palabra á Xunta de Galicia, o letrado actuante alega que a medida non supón ningún prexuízo para os demandados, senón máis ben un beneficio, pois garante a conservación dos bens".

O auto do xulgado de Madrid recolle tamén que Concello de Sada alegaba, para pedir as medidas cautelares, que "existen circunstancias obxectivas e suficientes que evidencian un risco dimanante do traslado ou retirada deses bens. Afirma que existe un informe do ISPONA en que se evidencia a falta de conservación actual dalgún deses bens".