Begoña Gómez di que non fixo negocio á custa do máster que dirixía

Begoña Gómez, rompe o seu silencio nunha carta remitida a varios medios de comunicación.

Asegura que non fixo negocio á custa do máster que dirixía.

Di que non se apropiou do programa informático que se desenvolveu na súa cátedra, que non o rexistrou na Universidade e que non existe ningún documento que diga que é da súa propiedade. Gómez está a ser investigada por corrupción nos negocios e tráfico de influencias.

O presidente Pedro Sánchez asegura estar tranquilo e lamenta que a súa familia estea a pagar pola súa condición de presidente do Goberno.

Begoña Gómez, solicitou ao xuíz Juan Carlos Peinado que "aclare cales son os feitos" 

Tras coñecer a decisión do xuíz de remitir parte da súa investigación á Fiscalía Europea ao estar comprometidos fondos europeos, a defensa de Begoña Gómez presentou un escrito perante o xulgado de Instrución 41 de Madrid para coñecer o alcance da causa que segue instruíndo.

No escrito, o avogado Antonio Camacho invoca a tutela do dereito de defensa para requirir ao xulgado que "aclare cales son os feitos que na actualidade conformarían a causa que segue sendo competencia" do mesmo.

Explica que se lle notificou a parte dispositiva do auto no que o xuíz aceptaba a petición realizada pola Fiscalía para que lle remitise os contratos financiados con fondos europeos pola entidade pública Red.es á UTE Innova Next SLU Escuela de Negocios The Valley.

O maxistrado acordou ceder as pescudas relativas aos devanditos contratos "sen prexuízo das irregularidades vinculadas aos anteriores feitos que puidesen ser constitutivas de ilícitos penais e nas que se visen afectados fondos europeos".

Tras esta decisión, a defensa de Gómez sinala que, despois da resolución da Audiencia Provincial de Madrid que instaba o xuíz a acoutar a investigación precisamente aos devanditos contratos, son "exactamente eses feitos (...)" os que se investigaban no procedemento.

Na devandita resolución da Audiencia, que rexeitaba pechar a causa a pedimento da Fiscalía, o tribunal descartou que se debesen investigar os outros feitos denunciados por Mans Limpas, incluída a suposta relación de Begoña Gómez co rescate de Globalia, ao consideralo "unha simple conxectura".

O xuíz acordou este martes suspender as declaracións de testemuñas previstas este domingo, aínda que polo momento segue en pé a comparecencia como investigada de Begoña Gómez o 5 de xullo.