Begoña Gómez pide celeridade ao posible arquivo da causa e as acusacións cren que Sánchez tenta "coaccionar" o xuíz
Begoña Gómez pide celeridade ao posible arquivo da causa e as acusacións cren que Sánchez tenta "coaccionar" o xuíz
Begoña Gómez pide celeridade ao posible arquivo da causa e as acusacións cren que Sánchez tenta "coaccionar" o xuíz
A defensa de Gómez cre que agardar ao 30 de setembro "causaría un prexuízo de imposible reparación" á súa defendida
![O presidente do Goberno Pedro Sánchez e a súa dona Begoña Gómez (Diego Radamés / Europa Press)](https://img-g24-crtvg.flumotion.com/prog24/2024/20240702/BEGONAGOMEZEUROPAPRESS.jpg)
Novidades na investigación á muller do presidente do Goberno por posible tráfico de influencias e corrupción nos negocios.
A defensa de Begoña Gómez solicitou á Audiencia Provincial de Madrid que non demore ao 30 de setembro a súa avaliación sobre o recurso en que pedía o arquivo da causa ao entender que "causaría un prexuízo de imposible reparación" á súa defendida.
Así consta nun recurso de suplica do avogado de Gómez, ao que tivo acceso Europa Press, no que responde á providencia da Sección 23 da Audiencia Provincial na que informaba a partes de que o 30 de setembro estudaría tanto o recurso de Begoña Gómez como o da Fiscalía, que pedía delimitar a causa.
O letrado de Gómez, Antonio Camacho, lamenta que nesta causa están a producirse "graves violacións do dereito de defensa" tanto da súa defendida como dos outros dous investigados -o empresario Carlos Barrabés e o reitor da Universidade Complutense de Madrid, Joaquín Goyache.
Acusa o xuíz Peinado de que a instrución se leve cunha "errática deriva procesual e material", e explica á Audiencia Provincial que "desafortunadamente" recorrer ante a Sección 23 "é o único remedio que procesalmente cabe utilizar para tentar evitar irreparables danos no dereito de defensa".
Engade que piden unha resolución ao seu recurso con anterioridade a ese 30 de setembro porque "unha Xustiza tardía pode producir danos irreparables" no seu dereito á defensa dado que, ao seu xuízo, a instrución de Peinado "está infestada de actuacións que vulneran" ese dereito e de "graves irregularidades".
Pola súa banda, os avogados das acusacións populares acusan a Pedro Sánchez de tentar coaccionar o xuíz Peinado coa carta en que lle pide declarar por escrito. Sosteñen que o presidente do Goberno non pode impor as súas condicións e aseguran que ese escrito demostra que a defensa de Begoña Gómez mente cando insiste en que non sabe de que se acusa a muller do presidente do Goberno.