Belén Toimil e Saleta Fernández, primeiras medallas galegas no Campionato de España

No campionato de España de atletismo en pista cuberta chegaron as primeiras dúas medallas da delegación galega. Belén Toimil cumpriu cos prognósticos e sumou o ouro no lanzamento de peso. A mugardesa acadou o seu obxectivo en Ourense, que non era outro que lanzar por riba dos dezaoito metros. Fíxoo co seu terceiro lanzamento, que foi de 18,23, récord do campionato. Con el, Toimil acada o seu cuarto título de España.

Na sesión da mañá, Saleta Fernández obtivera a primeira medalla galega. Foi unha prata no salto de altura, cunha marca de 1.82 metros que foi insuficiente para arrebatarlle o triunfo á granadina Una Stancev. A propia Una defendía a vitoria que obtivera o ano pasado, e revalidou o ouro ao conseguir unha marca de 1.84 metros.