Benítez recoñece que lle deu “moitas voltas” ao partido ante a Real Sociedade

Rafa Benítez, adestrador do R. C. Celta, recoñeceu este luns que lle deu “moitas voltas” ao partido que o seu equipo perdeu o pasado sábado fronte á Real Sociedade (0-1) en Balaídos, escenario mañá da eliminatoria de cuartos de final da Copa do Rei que, 72 horas despois, volverá enfrontar os dous equipos.

“Deille moitas voltas. Analizamos sistemas, movementos, o que fixemos con balón e sen balón, e a valoración do que podemos facer agora depende moito de como estean os xogadores, de quen estea máis fresco e quen encaixa desde o punto de vista técnico-táctico para manter o ritmo alto que vai impoñer a Real”, afirmou.

Na súa comparecencia ante os xornalistas, Benítez confirmou que medita saír cunha defensa de tres centrais para dotar de “máis equilibrio” ao seu equipo, ao que ve “ilusionado” con alcanzar as semifinais a pesar de que enfronte terá a un rival de moito nivel.

“Temos moitos factores a favor: o campo, o público, a motivación, a ilusión...”, incidiu o técnico celeste, que non escatimou eloxios ao xogo do equipo dirixido por Imanol Alguacil.

“Vimos un equipo con moitas características que ves cando xogan en Europa e que cando as levan á práctica en LaLiga é difícil de contrarrestar. Non son parvo, ningún dos que están no noso corpo técnico é parvo, vemos o partido e sabemos que é difícil. Agora hai que buscar como facerlles dano”, sinalou.

Neste sentido, independentemente da formulación táctica do seu rival, Benítez dixo que terán que ser capaces de “meter presión arriba cando sexa necesario” e de “esperar” cando sexan apertados pola Real Sociedade para atopar “o espazo ás costas”.