Biden anuncia que se vai unir aos piquetes do sector automobilístico en folga

O presidente dos EUA, Joe Biden, anunciou que o vindeiro martes irá a Míchigan para sumarse aos piquetes do sector de automóbil que desde hai unha semana están en folga reclamando unhas  condicións laborais mellores.

"O martes irei a Míchigan para sumarme aos piquetes e mostrar a miña solidariedade cos homes e mulleres do sindicato UAW na súa loita por unha parte xusta do valor que axudaron a crear", indicou o mandatario en X (anteriormente Twitter).

Segundo engadiu nesa rede social, é hora de que ambas as dúas partes cheguen a un acordo mutuamente beneficioso que manteña "florecente" o sector estadounidense da automoción con traballos ben pagados.

O United Auto Workers (UAW) demanda aumentos salariais dun 40 % distribuídos nos vindeiros catro anos, a eliminación das diferenzas salariais entre persoal de plantas das mesmas empresas, máis garantías de seguridade laboral e recuperar as axudas que tiveron ata 2009 para compensar o aumento do custo da vida.

O sindicato declarou o 15 de setembro a folga en tres plantas de montaxe de General Motors (GM), Ford e Stellantis ao non conseguir un acordo para a sinatura dun novo convenio colectivo con esas tres empresas para esa data.

Este venres, ampliou o paro a 38 centros de traballo de GM e Stellantis, ao considerar que non está a haber avances na negociación con ambos os dous fabricantes. Porén, excluíu desa ampliación a Ford ao estimar que está a "tomar en serio" a consecución dun acordo.

Visita de Biden

A visita de Biden producirase na véspera de que Donald Trump (2017-2021), segundo filtraron os medios, vaia a Míchigan para falar ante sindicalistas.

O exmandatario republicano saltará con esa intervención o debate que o seu partido organizou ese día nos Ánxeles con candidatos conservadores ao nomeamento republicano para as presidenciais de 2024.