Biden e Trump chaman á unidade nacional, mentres o FBI investiga o motivo do ataque
Biden e Trump chaman á unidade nacional, mentres o FBI investiga o motivo do ataque
![Unha gran bandeira de](https://img-g24-crtvg.flumotion.com/prog24/2024/20240715/BANDEIRATRUMPEUROPAPRESS.jpg)
O intento de asasinato contra o expresidente Donald Trump sacudiu a política estadounidense e provocou chamamentos á unidade nacional por parte dos líderes dos partidos demócrata e republicano, mentres o FBI tenta esclarecer os motivos do atacante.
Por agora, o FBI soubo que o autor do atentado, Thomas Crooks, de 20 anos, actuou só e disparou ao exgobernante (2017-2021) desde a azotea dun tellado usando un fusil AR-15 que fora comprado legalmente polo seu pai.
Crooks, que foi abatido por axentes do Servizo Secreto só segundos despois de abrir fogo contra Trump, estaba rexistrado como votante do Partido Republicano. Con todo, rexistros electorais mostran que alguén co seu nome e dirección fixo en 2021 unha doazón de 15 dólares ao Proxecto de Participación Progresista, unha organización demócrata.
O suceso está a ser investigado como un caso de "terrorismo doméstico", explicou este domingo nunha teleconferencia Kevin P. Rojek, o axente do FBI que dirixe a investigación.
Segundo fontes da investigación citadas por medios locais, as autoridades atoparon no vehículo e a residencia do atacante material rudimentario para facer bombas, pero descoñécese de que tipo. Agora mesmo, o FBI está a analizar eses dispositivos nas súas oficinas de Quantico (Virginia).
O intento de asasinato de Trump, o primeiro incidente dese tipo desde o que sufriu en 1981 Ronald Reagan, suscitou importantes interrogantes sobre os posibles fallos que houbo nos protocolos de seguridade e que permitiron ao atacante subir a un tellado e disparar ata oito veces antes de ser abatido.
O atentado conmocionou o país e provocou chamamentos a moderar a retórica política en vésperas da Convención Nacional Republicana en Milwaukee.
Trump, sen medo
Trump, que foi ferido no ataque, chegou o domingo á noite a Milwaukee, onde esta semana será designado oficialmente como o candidato do Partido Republicano para as eleccións do 5 de novembro.
O exmandatario, que pasou o día recluído no seu club de golf en Nova Jersey, asegurou nun comentario na rede social Truth Social que non ten medo e que se manterá forte e "desafiante".
"Grazas a todos polos pensamentos e oracións onte. É coma se fose Deus só quen evitou que o impensable pasase. Non teremos MEDO, senón que nos manteremos fortes na nosa fe e desafiantes fronte ao mal", asegurou o expresidente, quen tamén fixo chamamentos á unidade.
Trump atopábase dando un mitin en Butler (Pensilvania) o sábado cando foi alcanzado por unha bala na orella dereita. No suceso, dúas persoas quedaron feridas e unha morreu.
O asistente falecido foi identificado este domingo como Corey Comperatore, un bombeiro e pai de dúas fillas. Nunha conferencia de prensa, o gobernador de Pensilvania, o demócrata Josh Shapiro, confirmou a súa identidade e declarou que morreu como "un heroe", pois faleceu mentres tentaba protexer a súa familia dos disparos.
Biden pide resolver as diferenzas "nas urnas, non con balas"
Pola súa banda, o presidente estadounidense, Joe Biden, fixo un chamamento á unidade nacional este mesmo domingo.
Nun discurso desde o despacho Oval da Casa Branca pediu "arrefriar" o clima político nos Estados Unidos tras unha campaña electoral especialmente convulsa e urxiu os estadounidenses a resolveren as súas diferenzas "nas urnas, non coas balas".
"Nos Estados Unidos, resolvemos as nosas diferenzas nas urnas. Así é como o facemos, nas urnas, non con balas", declarou o mandatario nun discurso que durou aproximadamente seis minutos e foi transmitido polas principais cadeas de televisión.
Biden cancelou unha viaxe programada para mañá a Austin (Texas) co fin de permanecer na Casa Branca, onde ten previsto recibir informes de intelixencia e seguridade.