Biden volve á campaña con optimismo: "Preséntome para acabar o traballo"

O presidente estadounidense, Joe Biden, retomou a súa campaña cunha visita a Michigan, un dos Estados clave nos que os demócratas decidiron centrar esforzos para gañarlle ao exmandatario republicano Donald Trump (2017-2021).

Tras a "paréntese" electoral polo cume da OTAN, celebrada desde o martes e ata o xoves en Washington, Biden volveu poñer o foco nas presidenciais do 5 de novembro cun encontro directo cos seus votantes, esta vez na pequena cidade de Northville, duns 6.000 habitantes.

"Preséntome para acabar o traballo. Quedan cousas por facer. Sei que só teño 41 anos", dixo chanceando.

Tras as críticas a súa idade e o pobre papel que desempeñou no debate do pasado 27 de xuño, Biden recorreu ao humor para tentar restarlle importancia aos seus 81 anos.

"Durante moito tempo fun demasiado novo. Fun o segundo home máis novo elixido para o Senado. E agora son demasiado maior, pero sei que, con sorte, coa idade chega un pouco de sabedoría", engadiu o mandatario demócrata, que lle saca só tres anos e medio a Trump.

Durante a súa intervención, lembrou que no 2020 se postulou á presidencia coa idea de recuperar a ética na política e agora incidiu na mesma liña, subliñando que o seu rival republicano non pode considerarse unha alternativa.

"Este é un momento importante. (...) A decencia importa", asegurou.

Segundo manifestou, nunca estivo máis optimista sobre as posibilidades dos Estados Unidos e nestes tres anos e medio nos que estivo ao mando conseguiu "moitos avances".

Repensar a candidatura

Ese optimismo contrasta cos crecentes chamamentos a repensar a súa candidatura, que lle chegan desde as súas propias filas e de destacadas figuras do espectáculo, como George Clooney o mércores ou Ashley Judd este venres.

Segundo unha nota interna da súa campaña á que tivo acceso EFE, o "camiño aos 270", os votos electorais mínimos necesarios para gañar as presidenciais, ten "a súa vía máis clara" con vitorias en Wisconsin, Michigan e Pensilvania, que conforman o chamado "muro azul" demócrata.

"Debe retirarse"

Unha exclusiva publicada este venres por NBC News destaca, con todo, que varios asesores moi próximos a Biden cren que non hai un camiño viable para que poida vencer a Trump e que debe "retirarse", xa que "nunca se vai poder recuperar" da mala actuación no debate e do aumento da atención sobre a súa idade e a súa capacidade de gobernar catro anos máis.

O diario The New York Times engadiu este venres que grandes doantes demócratas dixeron ao maior comité de acción política partidario de Biden, Future Forward, que a súa promesa de achegar 90 millóns de dólares quedará en suspenso se segue adiante.

De momento case unha vintena de lexisladores demócratas expresaron publicamente que debería retirarse, facendo que aumente a presión sobre el.

Mentres, Trump segue á cabeza nas enquisas e esta próxima semana verá confirmada a súa candidatura republicana na convención que o seu partido celebra en Milwaukee.