Blinken aterra na China para tentar rebaixar as tensións entre ambos os dous países

O secretario de Estado dos EUA, Antony Blinken, chegou este domingo á China, o que o converte no funcionario estadounidense de maior rango que visita o país desde que o presidente norteamericano, Joe Biden, comezou o seu mandato en 2021, informou a cadea estatal CGTN.

Tras un ano de tensións entre as dúas potencias, os expertos pregúntanse se a visita de Blinken logrará tranquilizar os ánimos e canalizar a relación bilateral, ou se pola contra as desavinzas entre Washington e Pequín alcanzaron un punto de non retorno.

De feito, o secretario tiña planeado visitar a China en febreiro, pero o derrubamento dun suposto globo espía chinés sobre territorio estadounidense provocou que se cancelara a viaxe no último momento.

Este venres, o portavoz da chancelería chinesa Wang Wenbin declarou en conferencia de prensa que ambas as dúas partes "tratarán cuestións sobre as que existe unha preocupación mutua" e que o país asiático "protexerá firmemente os seus propios intereses".

Reducir conflitos

Así mesmo, expertos chineses citados pola prensa local vaticinaron que a cooperación económica, o conflito entre Rusia e Ucraína, a cuestión de Taiwán e a preparación das seguintes reunións de alto nivel serán cuestións prioritarias durante a visita de Blinken.

"A disposición á comunicación sempre existiu entre a China e os Estados Unidos e ambos os dous agardan evitar fallos estratéxicos de cálculo, reducir os conflitos e estabilizar as relacións mediante o diálogo", explicou a CGTN o director do Instituto de Estudos Estadounidenses da Academia Chinesa de Ciencias Sociais, Yuan Zheng.

Segundo dixo, "malia que as relacións se viron gravemente deterioradas tras o incidente do globo", houbo "síntomas dun desxeo" nos últimos meses e un "maior compromiso de alto nivel" entre as dúas potencias.