Bolsonaro volve ao Brasil para reagrupar unha dereita dividida contra Lula

O expresidente brasileiro Jair Bolsonaro regresou este xoves ao Brasil coa tarefa de reagrupar a unha dereita atomizada fronte ao Goberno de Lula da Silva e que lle deu unha fría recepción tras o seu "autoexilio" nos Estados Unidos.

Pouco máis dun cento de persoas agardaron no aeroporto de Brasilia e na sede do Partido Liberal á que se dirixiu tras pisar o chan brasileiro. Bolsonaro marchara do país o pasado 30 de decembro, aínda como presidente e dous días antes da investidura de Lula, a quen se negou a entregarlle o cargo.

Non foron as multitudes que mobilizou na campaña para as eleccións de outubro pasado, cando Lula gañou por unha diferenza de escasos 1,8 puntos porcentuais, o que reflicte as discordias que existen no campo conservador.

Bolsonaro deixou claro que a súa intención é recompoñer forzas co Partido Liberal, onde exerce como presidente de honra para actuar como oposición ao Gobierno de Lula. Na sede do Partido Liberal participou nun evento para "convidados" en que valorou o talante conservador do Parlamento e a forza do Partido Liberal, aos que instou a liderar a oposición a Lula.