Boris Johnson contaría cos apoios suficientes para acceder ás primarias

No Reino Unido están á espera de coñecer os nomes dos aspirantes a substituír a exprimeira ministra Liz Truss á fronte do partido conservador e do Goberno. Hai dous aspirantes que contan cos avais necesarios para ser candidatos, Boris Johnson e o exministro de Economía, Rishi Sunak. Os dous gardan silencio sobre as súas intencións. Teñen de prazo ata o luns.

Boris Johnson aterrou este sábado no aeroporto de Gatwick procedente da República Dominicana, onde pasaba unhas vacacións coa súa familia. Un medio británico contou que algúns pasaxeiros do avión apuparon o exprimeiro ministro.

A pesar de que Johnson non fixo comentarios en público sobre as súas intencións, fontes da súa campaña afirman que está disposto a competir nas primarias do partido conservador e volver a Downing Street un mes despois de abandonalo. E aseguran que conseguiu reunir os avais necesarios para ser candidato.

Pero varios deputados conservadores desmentírono e din que Johnson só contaría coa metade das cen sinaturas que precisa.

Rishi Sunak

Quen si parece contar xa desde o venres cos avais necesarios é o exministro de economía Rishi Sunak, o perdedor fronte a Liz Truss das primarias anteriores celebradas hai unhas semanas. Sunak tampouco se pronunciou publicamente sobre a súa candidatura. Segundo parece, non quere unha segunda derrota e podería estar á espera de saber se Johnson ten ou non as cen sinaturas.

Atrás quedaría a única aspirante oficial, a exministra de Defensa Penny Mordaunt, que a penas supera a vintena de avais.