Boris Johnson regresa ao Reino Unido para intentar entrar nas primarias dos "torys"

O exprimeiro ministro británico, Boris Johnson, chegou este sábado ao Reino Unido disposto a suceder a Liz Truss á fronte do partido conservador e do Goberno. Johnson e o exministro de economía Rishi Sunak aparecen como claros favoritos, aínda que de momento ningún presentou oficialmente a súa candidatura. Teñen de prazo ata o luns para conseguir os apoios que precisan.

Segundo lle contou o secretario de comercio e seguidor de Johnson á televisión pública británica, o exprimeiro ministro abandonou este exclusivo hotel da Republica Dominicana, onde pasaba as vacacións, para volver á casa e entrar nas primarias do partido conservador.

Os candidatos teñen ata o luns ás dúas da tarde para reunir as cen sinaturas que precisan para presentarse, dun total de 357. O único que de momento conseguiu superar esa cifra é o exministro de economía Rishi Sunak. Johnson roldaría o medio cento e a terceira aspirante, a única que anunciou oficialmente a súa intención de presentarse, Penny Mordaunt, contaría cuns 25 avais.

Así pois todo parece indicar que a batalla estará entre Johnson e Sunak.
Johnson dimitiu en xullo tras a rebelión de varios membros do seu Goberno polo escándalo das festas celebradas en plena pandemia. E Sunak, que foi quen alertou das consecuencias que tería unha redución drásticas dos impostos, perdeu as primarias fronte a Liz Truss, e agora non quere unha segunda derrota.

Con todo, tampouco se descarta que finalmente o partido opte por unha candidata de consenso que convertería a Penny Mordaunt en líder dos conservadores e primeira ministra.
O proceso, aberto tras a dimisión o xoves de Liz Truss, finalizará o próximo venres, pero a solución podería chegar xa este luns se un dos aspirantes consegue os votos necesarios.