O Brasil elixe entre Lula e Bolsonaro nunhas eleccións de resultado incerto

Os brasileiros votan hoxe cun sistema electrónico que xerou numerosas suspicacias, pero que  sorprendentemente leva implantado 25 anos. Un total de 156 millóns de persoas teñen a opción de teclear o número 13, que corresponde a Lula, ou o 22 de Bolsonaro.

As opcións están abertas, malia que Lula da Silva levaba nas enquisas entre 3 e 5 puntos de marxe sobre Bolsonaro.

O ultradereitista ten detrás un forte traballo que realizan ao seu favor as igrexas evanxélicas. Promete frear a ampliación do aborto, tamén a loita contra a droga, a defensa da familia tradicional e dos dereitos individuais, e converterse nun freo contra o comunismo, que atribúe a Lula.

"Sen dubida el vai gañar, porque o que Deus determinou aquí para nós, ninguén o vai mudar", di unha seguidora de Bolsonaro.

Mentres, Lula da Silva aspira a regresar ao palacio presidencial de Planalto coa promesa de restauración da democracia efectiva tras o bolsonarismo, un programa social para mellorar a situación das clases traballadoras e o que denomina concertación nacional para unir a sociedade.

"Un sentimento de esperanza, de que mañá vai ser un novo día e de que todo vai chegar. É moi emocionante para a xente", comenta unha partidaria de Lula.

A campaña para esta segunda volta ensuciouse con fake news e descualificacións extremas lanzadas desde os equipos dos dous candidatos. Uns sinalaban a Bolsonaro como pederasta e canibalista, mentres os outros acusaban a Lula de satánico e narcotraficante.