Bruxelas multa con 798 millóns de euros a Meta por incumprir as normas antimonopolio

A Comisión Europea (CE) impúxolle este xoves unha multa de 797,72 millóns de euros a Meta por incumprir as normas antimonopolio da Unión Europea ao vincular o seu servizo de anuncios clasificados en liña Facebook Marketplace á súa rede social Facebook e impoñer condicións comerciais desleais a outros provedores desta mesma prestación. 

O Executivo comunitario subliñou que a empresa abusou da súa posición dominante ao vincular Facebook Marketplace a Facebook, de maneira que todos os usuarios da rede social teñen automaticamente acceso e quedan regularmente expostos ao seu servizo de anuncios clasificados en liña queiran ou non.

Por outra banda, a Comisión concluíu que os competidores poden verse excluídos, xa que o vínculo outorga a Facebook Marketplace "unha vantaxe de distribución substancial que os competidores non poden igualar" e, segundo Bruxelas, Meta tamén abusou da súa posición dominante ao impoñer unilateralmente condicións comerciais desleais a outros provedores de servizos de anuncios clasificados en liña que se anuncian nas plataformas da empresa de Zuckerberg.

Para a imposición do nivel da multa, o Executivo comunitario tivo en conta "a duración e a gravidade da infracción", así como o volume de negocio de Facebook Marketplace ao que se refiren as violacións, considerando tamén o total de Meta.

Meta critica a decisión e anuncia recurso

​​​​​​​Meta anunciou que recorrerá a multa de case 800 millóns de euros por incumprir supostamente as normas anti-monopolio da Unión Europea (UE) co seu servizo de anuncios clasificados Facebook Market.

"Recorreremos a decisión. Mentres tanto, acatarémola e traballaremos de forma rápida e construtiva para atopar unha solución que aborde as cuestións expostas", asegurou hoxe Meta nun comunicado.

"Media década de investigación pero ningunha teoría coherente nin probas de dano", reza un dos epígrafes do comunicado de Meta, onde se indica que "os usuarios de Facebook poden elixir se queren ou non participar en Marketplace, e moitos non o fan".

Ademais, segundo Bruxelas, Meta tamén abusou da súa posición dominante ao impoñer unilateralmente condicións comerciais desleais a outros provedores de servizos de anuncios clasificados en liña que se anuncian nas plataformas de Meta, en particular, en Facebook e Instagram.

Ao que a empresa de Zuckerberg respondeu que non existen "probas" para tal afirmación e que nos mercados europeos "seguen crecendo e predominando" plataformas como eBay, Leboncoin en Francia, Marktplaats nos Países Baixos, Subito en Italia, Blocket en Suecia ou Finn.non en Noruega.

"O feito de que todo o caso se base nunha hipotética posibilidade de danar a competencia confirma que, no mellor dos casos, trátase dun caso que aínda está a buscar unha teoría coherente", continúa Meta no seu texto oficial.