Bruxelas propón un tope temporal e flexible ao prezo do gas

A Comisión Europea propuxo este martes crear un mecanismo temporal para limitar o prezo do gas natural nos mercados nos que se negocian os contratos do hidrocarburo.

O obxectivo é conseguir rebaixar a súa cotización durante os próximos meses e abaratar así a factura eléctrica de fogares e empresas.

"Tendo en conta a natureza da crise enerxética, e sobre a base do marco das medidas actuais de redución da demanda, chegou o momento de poñer en marcha un mecanismo así", xustifica a Comisión Europea.

Bruxelas quere obter o visto e prace dos Estados membros nas próximas semanas de forma que os servizos comunitarios poidan traballar inmediatamente nos detalles deste mecanismo "corrector" que se activaría "cando fose necesario".

"Tería que ser o suficientemente flexible para asegurar a subministración e o suficientemente amplo para que cubra os índices que temos na UE", resumiu en conferencia de prensa a xefa do Executivo comunitario, Ursula von der Leyen.

A idea inspírase na petición dunha quincena de Estados membros, entre eles España, reclamando un tope ao prezo de todas as importacións de gas.

Este mecanismo estaría en vigor ata que a Comisión Europea desenvolva un índice de referencia alterativo ao TTF Dutch, vinculado estreitamente á cotización do gas que chega por gasoduto que non recolle adecuadamente o prezo dos envíos de gas natural licuado (GNL).

Doutra banda, a Comisión Europea propón complementar este mecanismo cunha intervención nos mercados de derivados diarios que mitigue a "extrema volatilidade" das operacións e "protexa aos operadores enerxéticos de grandes movementos de prezos nun mesmo día".

A Comisión Europea propón tamén que os países merquen polo menos o 15 % do gas de forma conxunta.

A proposta baséase na participación obrigatoria de todos os Estados membros nun mecanismo de compras centralizadas no que se agregaría a demanda do hidrocarburo en cada país e a través da que se compraría "polo menos o 15 % dos seus obxectivos de almacenamento".

Bruxelas quere ter preparado un marco legal que permita iniciar xa en abril as compras conxuntas, unha idea que España e outros países reclaman desde finais de 2021.

"As compras de gas conxuntas teñen o potencial de reducir as ofertas descoordinadas para a subministración de gas entre Estados membros, o que resultaría nun acceso máis xusto a gas e potencialmente en menores prezos", argumentan as autoridades comunitarias.

Ademais, a Comisión Europea anima ás compañías enerxéticas a poñer en marcha un "sistema voluntario de compras" ou consorcio no que aproveiten tamén o seu poder conxunto de negociación, aínda que sempre que respecte as regras comunitarias de competencia.

Doutra banda, a proposta de regulamento de Bruxelas expón un modelo obrigatorio de solidariedade entre Estados membros que se utilizaría en casos de emerxencia cando non existan acordos bilaterais de colaboración entre países.

Neses casos, Bruxelas tamén establecería o prezo ao que se fixarían os intercambios e a proposta suxire utilizar o prezo medio do mes anterior á solicitude de asistencia.

Ademais, o Executivo comunitario suxire novas ideas para reducir de maneira "proactiva" o consumo "non esencial" de gas, sempre sen afectar consumidores vulnerables que non dispoñen de marxe para recortar máis a súa demanda.