Bruxelas activa 3 expedientes sancionadores contra Londres por incumprir o 'brexit'

A Comisión Europea (CE) anunciou este mércores que reactivará un procedemento de infracción contra o Reino Unido que fora "conxelado" e poñerá en marcha dous expedientes máis despois da nova lei impulsada polo primeiro ministro británico, Boris Johnson, para modificar unilateralmente o pactado para Irlanda do Norte no acordo do 'brexit'.

O expediente que Bruxelas vai reactivar -despois de conxelalo en marzo de 2021- lanzouse no seu día porque Londres non estaba a aplicar o acordo entre as partes en relación cos certificados esixidos para o movemento de produtos agroalimentarios.

Bruxelas vai enviar agora ao Reino Unido un ditame motivado, segundo paso do procedemento de infracción e, no caso de que Londres non responda de maneira "satisfactoria", a UE podería remitir o asunto ao Tribunal de Xustiza da UE, advertiron fontes comunitarias.

Ademais, Bruxelas poñerá en marcha dous novos procedementos en resposta ao incumprimento por parte de Londres das obrigacións sobre as regras europeas sanitarias e fitosanitarias, en particular pola falta dos controis necesarios e por non contar con persoal e infraestruturas adecuados.

"O que fixo Londres é ilegal"

O comisario para Relacións Interinstitucionais, Maros Sefcovic, dixo este mércores nunha conferencia de prensa que non existe "ningunha xustificación legal ou política para cambiar de forma unilateral un acordo internacional" e subliñou que o que fixo Londres é "ilegal".

Considerou que é "legalmente inconcibible" que o Reino Unido decida que tipo de bens poden entrar no mercado único e subliñou que os Estados membros están "unidos" nesta posición.

Por outra banda insistiu en que a UE non ten ningunha intención de renegociar o acordado. "Non imos reabrir todo o protocolo negociado hai dous anos", subliñou o comisario.

No entanto e a pesar de recoñecer que os contactos cos británicos foron inexistentes desde o pasado febreiro, o comisario mostrouse aberto a dialogar con Londres para resolver as diferenzas.

"É o momento de mostrar unha vontade política para atopar solucións", subliñou o comisario, e fixo fincapé en que iso esixe unha actitude "conxunta".

Ao mesmo tempo, a Comisión Europea fixo públicos hoxe detalles adicionais sobre as posibles solucións que presentou o pasado outubro para facilitar a circulación de mercadorías entre o Reino Unido e Irlanda do Norte.

En particular, presentou un modelo simplificado para a aplicación do protocolo, que inclúe unha serie de salvagardas para garantir que as mercadorías non entren no mercado único da UE.