Bruxelas retira a redución dos pesticidas nun 50 % e buscará acordar co agro outra proposta
Bruxelas retira a redución dos pesticidas nun 50 % e buscará acordar co agro outra proposta
A presidenta da Comisión Europea, Ursula von der Leyen, recoñece o descontento dos agricultores, aos que tratará de implicar nun novo proxecto tendo en conta sempre os obxectivos climáticos e ambientais
![](https://img-g24-crtvg.flumotion.com/prog24/2023/20230414/APARECEMILDIUNASVIDESDOSALNES_frame_356.png)
A presidenta da Comisión Europea, Ursula von der Leyen, anunciou este martes que retirará a proposta para unha nova lei de uso sostible de pesticidas, cuxa tramitación na súa forma actual fracasou no Europarlamento e o Consello, e prometeu que involucrará máis ao sector agrícola na redacción do próximo borrador.
A lei, que expuña obxectivos vinculantes a nivel nacional e da UE para reducir nun 50 % o uso e o risco dos praguicidas químicos, así como o uso dos praguicidas máis perigosos para 2030, afrontara o rexeitamento do grupo de presión agroalimentario europeo por temor sobre o seu impacto na seguridade alimentaria.
"A Comisión propuxo a lexislación de uso sostible de pesticidas co obxectivo valioso de reducir os riscos dos produtos químicos para protexer plantas. Pero a proposta converteuse nun símbolo de polarización. Foi rexeitada polo Parlamento e xa non hai progreso tampouco no Consello. Por iso, propoñerei retirar a proposta", dixo Von der Leyen.
Ante o Parlamento Europeo, Von der Leyen asegurou que o problema "segue estando sobre a mesa" aínda sen esta proposta e apostou por "máis diálogo e un enfoque diferente" para seguir adiante.
Von der Leyen recoñeceu o descontento dos agricultores, que "sentiron acantoados" e "merecen que os escoiten", pero advertiu, ao mesmo tempo, de que "tamén saben que a agricultura debe evolucionar cara a un modelo de produción máis sostible para que as súas explotacións sigan sendo rendibles nos próximos anos".
"Os nosos agricultores só investirán no futuro se poden vivir das súas terras. E só poderán seguir vivindo das súas terras se logramos xuntos os nosos obxectivos climáticos e ambientais", advertiu Von der Leyen.
Bruxelas quere aproveitar o marco do diálogo estratéxico sobre o futuro da agricultura na UE iniciado o pasado 25 de xaneiro para escoitar a todas as partes interesadas antes de presentar unha nova proposta, polo que é improbable que presente o borrador renovado no curto prazo. A lexislatura actual concluirá coas eleccións ao Parlamento Europeo entre o 6 e o 9 de xuño.