Buscan a quen pintou liñas descontinuas nos cruzamentos de Vilalonga, en Sanxenxo

Entre seis meses e dous anos de prisión e ata 300.000 euros de multa son as sancións ás que pode enfrontarse o presunto autor ou autores do repintado dunha estrada en Sanxenxo. Actuou en tres cruzamentos da rúa do Vilar en Vilalonga, onde están rematando as obras de remodelación.

Coa reforma chegou a liña continua, pero a alguén non lle debeu de parecer ben e, brocha na man, volveuna facer descontinua.

"Cando saín de aquí ás oito e media acababan de pintar a calzada, e ao día seguinte pola mañá xa estaba pintada de negro", relata Diana, que ten un comercio nesa rúa.

Quen o fixo actuou de noite. Pensaría que así podería evitar o quilómetro de volta que hai entre os dous cambios de sentido.

O caso é que a súa acción constitúe un presunto delito contra a seguridade viaria e pode implicar sancións importantes:

 "Pode levar penas de seis meses a dous anos, e tamén multas de ata 300.000 euros", explica Abelardo Martínez, policía local de Sanxenxo.

"Hai que darse de conta de que iso é un delito e que pode poñer en grave perigo outros usuarios da vía", engade. 

Policía Local e Garda Civil investigan os feitos. Están revisando as cámaras de seguridade que hai na zona, e parece que van estreitando o cerco sobre o presunto responsable:

 "Creo que está bastante pechado o círculo", di Martínez.

A chuvia impediu reparar a calzada ata agora, pero contan poder facelo xa e restituír a liña continua para evitar riscos na estrada.