Buscan un home acusado de abusar sexualmente da súa compañeira de piso en Lugo
Buscan un home acusado de abusar sexualmente da súa compañeira de piso en Lugo
A Fiscalía pide dous anos de cárcere para o imputado, que fuxiu antes do xuízo previsto para este martes
O Xulgado do Penal número 1 de Lugo ordenou este martes a localización e posta á disposición xudicial dun home acusado de abusar sexualmente da súa compañeira de piso na cidade de Lugo.
A orde deuse tras a incomparecencia do imputado no xuízo oral programado para este martes.
Os feitos que se lle imputan e polos que deberá ser xulgado tiveron lugar na cidade de Lugo no mes de abril de 2018, no domicilio que o presunto autor e a vítima compartían en réxime de compañeiros de piso.
Segundo o escrito da Fiscalía, o acusado entrou unha noite no cuarto en que se atopaba durmindo a súa compañeira e tombouse "completamente espido encima dela" bicándoa e tocándolle o corpo "sen o seu consentimento".
A muller fixo todo o posible para que o presunto agresor apartase, a pesar do cal o home continuou coa mesma actitude.
O Ministerio Fiscal entende que os feitos relatados son constitutivos dun delito de abuso sexual e solicitará para o acusado unha pena de dous anos de cárcere cando se celebre o xuízo.
