Denunciado un home en Lugo por portar armas brancas na vía pública
Denunciado un home en Lugo por portar armas brancas na vía pública
A policía tivo que intervir tamén en pisos por queixas relativas ao ruído molesto procedente de festas
Martelo e coitelo de cociña intervidos ao viandante en Lugo (POLICÍA LOCAL DE LUGO)
Axentes da Policía Local de Lugo identificaron e denunciaron por infracción da lei de protección da Seguridade cidadá a un home que portaba varias armas na vía pública, localizado tras varias chamadas de cidadáns, alertados ao ver que levaba o que parecía un machete.
Segundo informaron fontes policiais, os feitos ocorreron na mañá do pasado martes, cando dúas dotacións do 092 se despazaron ata a rúa Bispo Aguirre, comisionadas pola presenza dun home con armas brancas.
Ao chegar á zona, os axentes localizaron a un individuo cuxas características coincidían coas achegadas polos requirentes, polo que se procedeu ao seu cacheo, no que se comprobou que levaba un martelo-machete e un coitelo de cociña, que lle foron requisados.
Un condutor desorientado
Por outra banda, ese mesmo día a Policía Local de Lugo auxiliou un condutor octoxenario de 82 anos de idade, que se atopaba na Calzada das Gándaras e que estaba desorientado e non lembraba onde vivía.
Os axentes puideron localizar a un fillo que se fixo cargo del e iniciaron un procedemento para que o condutor se sometese a un recoñecemento médico extraordinario, xa que podería perder aptitudes psicofísicas para poñerse ao volante.
Incidencias en festas
Finalmente, a Policía Local de Lugo informou de varias intervencións motivadas por queixas veciñais relativas ao ruído molesto procedente de festas, coa actuación dos axentes, na noite do mércores, nun piso da ronda das Fontiñas, onde o volume dunha celebración con 20 participantes impedía o descanso dos veciños.
Mentres, na noite do xoves, a Policía interveu polos ruídos doutras festas, unha nun piso da Avenida de Madrid e outra nunha entreplanta da Rúa dos Gardas, onde se estaba celebrando unha festa supostamente vinculada a un establecemento de hostalería que non tiña licenza de actividade.
Por este motivo confeccionouse acta de denuncia por varias infraccións: falta de licenza municipal, falta de seguro obrigatorio, por permitir aos asistentes saír ao exterior con consumicións, e por non presentar documentación acreditativa dunha máquina comecartos.
