Cada vez máis galegos prefiren voar dende Asturias por proximidade, destinos e frecuencias

Malia contar con tres aeroportos, Galicia rexistra unha fuga crecente de viaxeiros. Sábeno ben no norte das provincias da Coruña e Lugo, onde cada vez son máis os que se decantan polo aeroporto de Asturias, próximo a Avilés. 

"Por proximidade imos a Avilés. A min gústame moito o de Santiago, pero dende Ribadeo temos dúas horas e media".

Uns destacan a proximidade con Galicia e outros, o maior número de destinos, con 23 rutas, e máis frecuencias. E nesta loita de aeroportos, un dos que perde en detrimento de Asturias é o de Alvedro.

"Na Coruña hai poucas frecuencias, moitas veces teño que ir a Santiago e dende alí coller o tren. Hai poucas conexións e os voos son máis caros".

"A min resúltame máis cómodo ir a Avilés que á Coruña e a oferta de voos de Asturias é bastante completa".

"Alvedro non ten tantos voos internacionais e Asturias ten máis e nacionais case todos".

Moitos pasaxeiros foxen dos voos con conexións e prefiren voos directos.

"Hai máis voos directos e todo axuda".

"Eu busco voos directos para viaxar con nenos e miro León e Asturias".

O pasado ano o aeroporto de Asturias rozou os dous millóns de pasaxeiros, converténdose en líder de crecemento no norte de España.