O aeroporto da Lavacolla é o único dos tres galegos que perdeu pasaxeiros en xaneiro
O Rosalía de Castro, que segue sumando máis viaxeiros que os outros dous aeroportos galegos xuntos, sufriu o mes pasado unha caída do 5,6 % no tránsito de pasaxeiros
Peinador tivo un incremento do 3,4 % e Alvedro do 2,2 %
A pesar de finalizar o ano 2024 cun récord histórico de pasaxeiros, o aeroporto Rosalía de Castro de Santiago de Compostela comeza o ano 2025 perdendo pasaxeiros. E é o único dos tres galegos que neste mes pasado tivo menos tráfico que no mesmo período do ano pasado.
En total pasaron polo aeródromo da Lavacolla 187.988 pasaxeiros, o que, segundo datos de AENA, supón un descenso do 5,6 % respecto ao xaneiro de 2024.
Do total deses viaxeiros, 187.465 foron de voos comerciais, dos cales 165.420 con outros destinos españois e os 22.045 restantes doutros países.
O aeroporto Rosalía de Castro reséntese da temporada baixa, acusa o incremento dos viaxeiros en tren e sobre todo o descenso das conexións internacionais. Londres, París e tres cidades suízas son os únicos destinos directos no estranxeiro no comezo de ano.
Afectan ao tráfico da Lavacolla os pulsos de compañías como Ryanair, que outras -como Vueling- se ofrecen a compensar. Moitos destinos vanse recuperar a partir de primavera. Hai xa compañías aéreas que están ofrecendo alternativas, pero o pulso entre Ryanir e Aena, polas taxas aeroportuarias, podería supoñer en Santiago a eliminación de 370.000 prazas este ano.
Con todo, os pasaxeiros que empregaron o aeroporto compostelán superan a suma de todos os que pasaron polos outros dous galegos, Alvedro e Peinador.
No aeródromo de Vigo o tránsito de viaxeiros chegou ata os 78.635 pasaxeiros, un 3,4 % de incremento respecto a xaneiro de 2024. Deles 78.628 de avións comerciais, dos cales 74.766 con outros puntos de España e 3.862 de pasaxeiros de transporte aéreo con outros países.
Tamén o aeroporto da Coruña rexistrou o mes pasado un aumento de pasaxeiros, cun total de 94.452 viaxeiros rexistrados, un 2,2 % máis ca un ano antes. Do total de pasaxeiros, 94.333 foron de voos comerciais, incluídos 87.794 de traxectos con outros lugares de España e os restantes 6.539 con outros países.
Respecto ao tráfico de mercadorías, o aeroporto compostelán tivo en xaneiro 298 toneladas de mercadorías, mentres que o de Vigo tivo 35,6 toneladas e o da Coruña 4,9 toneladas.
