Carlos Alcaraz gaña en Wimbledon e inicia un novo ciclo no tenis mundial

Dicía Alcaraz que a gran final de Londres había que afrontala dende a temperanza. Probablemente a posta en escena non foi a soñada polo murciano, pero as cousas non son como empezan, senón como acaban. E esta tarde en Wimbledon, Alcaraz colocou a primeira pedra do seu reinado. 

Coa tranquilidade que caracteriza os campións, Alcaraz reiniciou o partido tras caer na primeira volta por 1-6. Fíxoo no tie break do segundo set, nun punto que resolveu coa clase dun número un. 

O xiro de acontecementos entumeceu a Djokovic. Dá igual cantas grandes finais xogues, 35 no seu caso, porque ningunha se parece. E á diferenza do acontecido en París en xuño, Alcaraz estaba divertíndose en Londres. O serbio, entrementres, sumaba erros non forzados que o minguaron ata sacalo do partido tras un quinto xogo interminable. Alcaraz conquistou o terceiro set cun solvente 6-1. 

O partido entrou nunha fase crítica. Con Djokovic obrigado a reinventarse, a esixencia sobre Alcaraz medraba. O español buscou a réplica cada vez que Novak asomaba a cabeza para meterse de volta no encontro. Con case catro horas de xogo ao lombo, o serbio tirou de galóns e Alcaraz acabou entregando a cuarta volta por 3-6. 

Coa tensión polas nubes, chegouse ao quinto set. Todo ou nada na rolda definitiva. Os puntos convertéronse nun intercambio de golpes físicos e mentais con que os dous máximos expoñentes do tenis mundial mediron as súas forzas. A batalla gañouna un rapaz de 20 anos, valente, que na pista central de Wimbledon iniciou un domingo 16 de xullo de 2023 un novo ciclo no tenis mundial.