Carlos Correa, o galego detido en Venezuela, é levado ante un tribunal de terrorismo
Carlos Correa, o galego detido en Venezuela, é levado ante un tribunal de terrorismo
A muller dirixiuse á sede do Servizo Bolivariano de Intelixencia (SEBIN) no Helicoide, en Caracas, onde lle volveron a asegurar que o seu marido non está nesas instalacións
A familia está á espera "dos últimos acontecementos" e confía en ter noticias "pronto"
Carlos Correa, activista e director da ONG Espacio Público
O director da ONG venezolana Espacio Público, o activista e xornalista de orixe galega Carlos Correa, foi presentado ante un tribunal de terrorismo de Venezuela unha semana despois de ser detido no país latinoamericano, segundo denunciou a súa muller Mabel Calderín.
O fiscal de delitos económicos Alirio Mendoza explicou á muller do galego que Correa foi levado o xoves pasado con defensa pública ante o Tribunal Cuarto de Control con Competencia de Terrorismo de Venezuela, aínda que non lle deu detalles sobre os cargos con que o imputaron.
Tal e como indicou nun comunicado de Espacio Público na rede social Instagram, Mendoza non lle deu información sobre o lugar no que se atopa recluído o xornalista. A muller dirixiuse á sede do Servizo Bolivariano de Intelixencia (SEBIN) no Helicoide, en Caracas, onde lle volveron a asegurar que o seu marido non está nesas instalacións.
"Cada día que pasa agrávase a saúde de Carlos, a súa vida e integridade persoal. Esixo ás autoridades que dean resposta e me permitan acceder ao lugar onde se atopa para que reciba os seus medicamentos e supervisión médica", declarou, en referencia ás patoloxías que sofre e que requiren tratamento permanente.
As últimas noticias de Correa foron que na xornada do xoves a súa muller puido entregar a medicación para que lla fixesen chegar, pero "non lle dixeron onde está". Calderín solicitou o habeas corpus. A familia está á espera "dos últimos acontecementos" e confía ter noticias "pronto".
