Carlos III atópase "ben" tras ser operado da próstata nun hospital de Londres

O rei británico, Carlos III, ingresou este venres nun hospital de Londres para ser intervido dun agrandamento da próstata, informou o Palacio de Buckingham nun comunicado.

Segundo a nota da Casa Real, o monarca está satisfeito de ver que o seu diagnóstico tivo "un impacto positivo" para concienciar a cidadanía sobre a saúde. 

"O rei foi ingresado este mañá nun hospital de Londres para un tratamento planificado. A súa maxestade quere agradecer a todos aqueles que enviaron os seus bos desexos durante a última semana e está encantado de coñecer que o seu diagnóstico está a ter un impacto positivo na concienciación cidadá sobre a saúde", sinala.

Os medios británicos difundiron imaxes de Carlos III abandonando a súa residencia de Clarence House e entrando xunto á raíña Camila no hospital London Clinic, no centro de Londres.

Precisamente nese mesmo lugar, a súa nora, Catarina, princesa de Gales, recupérase da cirurxía abdominal á que se someteu a semana pasada.

O rei chegou a Londres na noite do xoves desde a súa residencia de Sandringham, no leste de Inglaterra, para a súa intervención de hoxe.

O pasado 17 de xaneiro, Buckingham informou de que Carlos se sometería a un tratamento esta semana por un agrandamento de próstata "benigno", sen detallar a data.

O palacio agregou que "os compromisos públicos do rei -de 75 anos- se pospoñerán durante un breve período de recuperación".

Carlos III manifestou o seu desexo de compartir a súa afección coa cidadanía para animar outros homes a someterse a revisións, segundo a contorna do monarca.

Un día despois do anuncio, a raíña Camila dixo nun acto público que o seu esposo se atopa ben e que está "desexoso de volver ao traballo". 

Os medios británicos informaron que o rei Carlos III se atopa "ben" tras a intervención á que se someteu para tratar un agrandamento de próstata.