Case 650 galegos aprenderán idiomas este verán no estranxeiro con bolsas da Xunta

Un total de 645 estudantes galegos realizarán estancias este verán en cinco países para mellorar o seu nivel de idiomas grazas ás bolsas da Xunta, cun importe de arredor de dous millóns de euros.

O conselleiro de Educación, Ciencia, Universidades e Formación Profesional, Román Rodríguez, participou este sábado na xornada de benvida aos alumnos de Bacharelato que este verán viaxarán ao estranxeiro para mellorar o seu nivel en diferentes idiomas.

Rodríguez desexoulles a todos eles "a mellor formación e experiencia" nunhas estancias que teñen como obxectivo non só que os estudantes aprendan unha lingua estranxeira, senón tamén "que entren en contacto con outras linguas, persoas, culturas e realidades" nun contexto de inmersión ou integración nun país estranxeiro.

Segundo o conselleiro, a iniciativa "contribúe á súa formación integral e ao seu desenvolvemento persoal en plena adolescencia" e é ademais "unha porta de entrada a unha nova cultura, a outra forma de ver e entender o mundo".

Para o programa de estancias lingüísticas en países estranxeiros deste verán seleccionáronse un total de 407 alumnos de 1º de bacharelato e 238 alumnos de 2º de bacharelato, que gozarán de tres semanas nunha contorna residencial ou familiar no Reino Unido, Francia, Portugal, O Canadá e Alemaña no período estival, entre xullo e agosto.

Así, 339 estudantes viaxarán ao Reino Unido e 230 ao Canadá para mellorar os seus coñecementos de inglés; 60 farano a Francia para mellorar o francés; dez irán a Alemaña para mellorar o seu alemán e seis a Portugal para reforzar o seu portugués.