Celebran un espectacular achado no castro de San Vicente de Avión
Celebran un espectacular achado no castro de San Vicente de Avión
En catro días de traballo descubriron dúas pedras, con gravados castrexos, de grandes dimensións
Todo un achado que dispara o interese deste castro do século IV antes de Cristo
Eloi Saavedra, arqueólogo: "Foi moita emoción. Na anterior colleunos por sorpresa, pero esta xa sabiamos o que ía ser, e foi".
Jorge Lama Alberto, arqueólogo: "Ao darlle a volta e pasarlle a luva, dixemos, miña nai! é un tríscele!. Pero a sorpresa foi a segunda, porque nós pensamos que só ía haber unha".
Dúas marabillas arqueolóxicas en dous días é o que atoparon na escavación do castro de San Vicente. Primeiro un tríscele e despois unha cruz embolada, algo practicamente inédito.
Jorge Lama Alberto, arqueólogo: "Son cen metros cadrados e atopar dúas, unha a carón da outra, xa nos pon na mesma mesa de comer que San Cibrao de Las, Castromao...".
A escavación está financiada pola asociación cultural Vive Avión e a comunidade de montes de San Xusto, é dicir, págana os veciños, que tamén colaboran en todo o que poden porque están orgullosos do seu castro.
Amancio Bruquet, presidente da asociación cultural Vive Avión: "A emoción é impresionante. Aínda non acabou. Aparece cada día unha cousa. É espectacular e pon de manifesto o valor que ten o concello de Avión".
Con estes achados contan con darlles un novo impulso ás escavacións e afondar nas dimensións e usos deste castro que podería estar relacionado con rituais de culto ao sol e a espectacular paisaxe natural que o rodea.
