Cobran un suplemento aos pais polo mal comportamento dos fillos nun restaurante

Os nenos correron e berraron no restaurante e os donos do local cobráronlles un recargo de 50 dólares aos pais. Sucedeu en Xeorxia, pero a polémica chega ao noso país, onde xa hai un 8 % de establecementos só para adultos. 

"Todos fomos travesos de nenos, hai que ser tolerante".

"Se un pai precisa comer, non vai deixar o neno fóra, paréceme fatal".

"Podes dicirlle ao neno ou aos seus pais que non berren tanto, pero non deixalos entrar...".

"E despois que será? Prohibir entrada aos maiores? o mundo vai a peor", comentan na rúa.

En Consumo, téñeno claro. Unha cousa é o dereito de admisión, que se aplica por igual a todas as persoas, e outra ben diferente é discriminar un colectivo.

"Ese tipo de limitación é completamente ilegal, está no artigo 14 da Constitución, é unha discriminación por idade. Non poden impedir que entre unha familia cos nenos, por moito que o publiciten como so para adultos", explica Miguel López, secretario xeral da Unión de Consumidores de Galicia.

Educadores e psicólogos recordan que é responsabilidade colectiva educar a rapazada en determinados comportamentos. Sen excluílos da vida pública por actuar como o que son.

"Non teñen as mesmas habilidades, as mesmas capacidades, é lóxico que os nenos se comporten de xeito diferente. O que temos que facer como sociedade, pais en primeiro termo, pero toda a sociedade é ensinarlles a que vaian adquirindo habilidades sociais para interaccionar nos diferentes contextos nos que se desenvolven", engade Teresa Sánchez Castaño, profesora de Psicoloxía Infantil da USC.

Malia non poder prohibir a entrada, o que si poden facer os hostaleiros é ofertar un servizo máis ou menos atractivo para o público familiar.