Publican un anuncio cos horarios e produtos á venda nunha suposta narcovivenda

Os veciños do barrio do Castrillón, na Coruña, aínda non dan creto da ocorrencia. Na porta dun suposto punto de venda de droga, aparecía un cartel publicitando as substancias, os prezos e os horarios de atención ao público da narcovivenda. 

"O luns pechado, o martes festival e o mércores 2x1 en papelinas", le o presidente da asociación de veciños, Ramiro Otero.

"E despois os prezos: coca, 60 euros; base, 40; herba, sete", engade, aínda incrédulo. 

Conta que o letreiro apareceu despois dunha intervención policial na vivenda, que rematou cunha persoa detida.

"Ás dúas horas volveron colocar a porta e, de cachondeo, colgaron un cartel de venda de drogas e estupefacientes", relata Otero. 

O cartel xa foi retirado e, malia que saben que foi unha broma, din que foi "macabra". Parécelles que "están cachondeándose da xente". E é que pouca broma queren no barrio coa situación que viven.

Denuncian que hai meses que nesta vivenda ocupada hai venda de drogas, e medra a sensación de inseguridade na zona.

"A xente vai con medo á compra porque non é a primeira vez que dan un tirón", di unha veciña.

Din que hai vixilancia policial, pero que non abonda para erradicar o problema: se conseguen desaloxalos dun punto, saltan a outro. 

"Temos unha cantidade aquí destas casas pequenas que se meten os ocupas traficar, e non hai outra cousa", explica un veciño do Castrillón. 

Dende a asociación veciñal piden tapiar ou derrubar as vivendas abandonadas que quedan no barrio, para ver se conseguen desaloxar os traficantes.