Romanos e castrexos toman as rúas de Lugo no Arde Lucus

Os romanos xa tomaron Lugo. Os lexionarios lograron atravesar o Miño e vencer a resistencia dos galaicos. Como xa imaxinan, falamos do Arde Lucus. A recreación da loita entre castrexos e romanos marcou o inicio das festas deste ano que se prolongarán ata a noite do domingo, con máis de 300 actos programados.

Toda unha cidade implicada na recreación histórica da súa fundación.  Así o contan os participantes: "O bonito non é a festa en si, nin a recreación moi exacta que se fai dende as asociacións, senón a participación de toda a cidade. Aquí, ademais dos grupos históricos, ves os veciños caracterizados". "O Arde Lucus é loucura, é obsesión. Todos os anos nos esforzamos por mellorar". "Esforzámonos por ter novidades ano tras ano". "A festa chegou a onde está gracias a esa involucración e a facer as cousas ben"

Moito traballo das asociacións e, efectivamente, implicación da veciñanza. Estes días en Lugo pódese ir traballar caracterizado. "A verdade é que nos gusta, porque é a nosa festa", di a empregada dunha óptica vestida de romana.

Despois de máis de 20 anos de celebración, o Arde Lucus non só e un escaparate publicitario da cidade a nivel nacional e internacional, senón tamén un importante pulo económico. "Eu son de México e xa nos falaran desta festa". "Somos de Bilbao. Xa coñecemos o Arde Lucus e quixemos volver porque nos gusta moito", din uns turistas.  

Preocupa, pero pouco, a previsión do tempo. Fresco e algo de chuvia. "Estamos acostumados á auga e temos paraugas", aseguran os máis optimistas

Dende o ano pasado é Festa de Interese Turístico Internacional.