Incáutanse de varias armas de fogo e brancas en Porto do Son grazas ao aviso duns turistas

Axentes da Garda Civil en colaboración coa Policía Local comisaron dúas escopetas de aire comprimido, un revólver de fogueo, unha pistola eléctrica e tres navallas na praia das Furnas en Porto do Son tras o aviso duns turistas.

Un grupo de estranxeiros avisou da presenza dun home cun revólver e unha pistola eléctrica tipo Táser na praia das Furnas.

A Policía Local e a Garda Civil localizaron un home veciño do Porto do Son que coincidía coa descrición facilitada e rexistraron o seu vehículo. Nel, atoparon un revólver de fogueo con tres cartuchos detonados, tres navallas unha pistola eléctrica tipo Táser, prohibida para particulares, con dúas cargas dispostas para o seu uso e dúas escopetas de aire comprimido sen a documentación pertinente.

Os axentes incautáronse das armas atopadas e confeccionaron unha denuncia por supostas infraccións graves da Lei de seguridade cidadá.