Compra flexible ou alugueiro, novas modalidades de consumo para mercar un coche

Á hora de mercar un coche, o mercado ofrece opcións diferente a aquelas a que estamos máis afeitos, como a compra ao contado ou o financiamento tradicional. E tamén ofrece novas modalidades de pagamento por cotas. É o caso da compra flexible.

"Iso permite a un medio prazo ter unha ventá aberta para decidir se cambiar o coche, entregalo ou substituílo por un coche máis eficiente no momento en que sexa ese cambio de financiamento", explica Juan Crego, xefe de vendas de Marineda Motor.

Outra opción é o renting.

"O cliente non dá ningún tipo de entrada, paga unha cota mensual e leva todos os servizos incluídos. Desde mantemento, rodas, seguro. Son cotas mensuais, pero son un pouco máis elevadas pola inclusión de todos eses servizos", apunta Ángel Pérez, xerente de Sibuscascoche.

O renting ou alugueiro implica que quen compra o coche non ten a súa propiedade. Isto supón un condicionante á hora de escoller esta modalidade de opción de compra. 

Con todo, no propio sector apuntan que os patróns de consumo están a mudar.

"O cliente ten a seguridade tanto na opción futuro como no renting de que se as restricións ou as normativas están cambiando, ao final non é dono dese coche ou pode devolvelo cando queira", engade Ángel Pérez, xerente de Sibuscascoche.

Novas formas de consumo nun mercado condicionado polos grandes desafíos medioambientais.