Rueda, sobre a prórroga dos orzamentos do Estado: "Terá consecuencias e ningunha positiva para Galicia"

"Galicia vai perder moitísimas oportunidades", cre Alfonso Rueda, pola decisión do presidente do Goberno de prorrogar os presupostos xerais do Estado (PXE) de 2023 logo que se anunciase a convocatoria electoral en Cataluña.

"Supoño que moitísimas das cousas ás que temos dereito, e que seguirei reclamando, vanse ver dificultadas pola ausencia de orzamentos", dixo o presidente da Xunta quen tamén dixo que agarda "que non lle valga como escusa para seguir privilexiando tamén a uns territorios fronte e outros".

"Veremos a partir da agora o que se pode facer e o que non", afirmou, "pero desde logo todas as infraestruturas que estabamos demandando, todo iso sen ningunha dúbida vaise ver afectado polos orzamentos, todo o que ten que ver cos fondos europeos, os Next Generation..., todo iso vai ter consecuencias e ningunha positiva".

Alfonso Rueda tamén anunciou que encargou ao conselleiro de Facenda un informe sobre as consecuencias que vai ter a prórroga dos PXE e os "prexuízos directos que vai empezar a haber", dixo pero "desde logo creo que é unha malísima noticia".

Segundo Rueda a decisión confirma o feito de que "hai tempo que en España non hai un Goberno".

Criticou a Pedro Sánchez porque "despois de dicirnos durante todos estes días que eran unha prioridade para o seu Goberno, e de dicir o que dixo cando estaba na oposición, que un Goberno sen orzamentos era como un coche sen gasolina, agora parece ser que é algo absolutamente normal e non o é en absoluto".

"Agora de repente o presidente do Goberno, despois de aprobar a lei que lle serve para seguir no poder [a lei de amnistía], a de orzamentos parece que non lle é prioritario, e tira para atrás como se non tivese importancia e si que a ten. Eu non me imaxinaría a Galicia sen orzamentos", concluíu Rueda.