Continúa a mala calidade do aire nalgúns puntos de Vigo

Vigo foi unha das primeiras cidades onde se detectou o fume dos incendios de Portugal e a última en quedar libre del. Esta mañá nalgunhas zonas como Coia ou Balaídos a calidade do aire seguía sendo mala. 

Polo de agora aínda hai partículas en suspensión polo que se recomenda reducir a actividade prolongada no exterior. Aínda así, segundo os veciños nada que ver cos días anteriores. Moitos, animados por un sol radiante volvían pasear despois de varios días evitando saír da casa. 

Salvo o caso puntual de Vigo na maior parte de Galicia a calidade do aire xa é favorable e agárdase que vaia mellorando cada vez máis coas próximas chuvias.