Continúa a busca dos desaparecidos inspeccionando cada recuncho das áreas afectadas

Non hai descanso para poder recuperar unha parte da normalidade que se perdía nos municipios afectados tras do paso da DINA. "Perdémolo todo", lamenta un veciño.

Centos de veciños e voluntarios traballan xunto cos efectivos da UME e do Exército para despexar as rúas aínda cubertas de barro. "Limpando e achicando auga en baixos e garaxes" explica un bombeiro. 

Tamén se limpan vivendas e centros coma esta escola infantil de Aldaia, onde se preparaban para unha celebración do Samaín que nunca chegou. "Estivemos aquí máis de 40 persoas colaborando", explica o cociñeiro da escola.

A prioridade segue estando na busca dos desaparecidos. Os efectivos inspeccionan vehículos, garaxes e aqueles lugares cara a onde puido arrastrar a forza da auga. Non hai cifra oficial de desaparecidos. Di o Goberno que é necesario ser prudentes.

"Hai unha cifra que se está manexando no centro de coordinación e é bastante baixa. Pero non temos confianza en que responda á realidade e polo tanto hai que ser prudentes", detalla Óscar Puente, ministro de Transportes.

A atención sanitaria á poboación estase reforzando coa instalación de hospitais de campaña. Atenden consultas médicas e de enfermería e tamén a necesidade de medicamentos. Os sanitarios piden extremar as medidas de protección nos labores de limpeza e desentullo para previr posibles infeccións.