Empate no Arcángel que lle serve de pouco ao Deportivo (1-1)
Empate no Arcángel que lle serve de pouco ao Deportivo (1-1)
Quiles adiantou o equipo coruñés e tivo que retirarse mancado por unha patada na cara
O Córdoba empatou nunha xogada confusa na que Jaime rematou cara á súa propia portería
Óscar Cano sorprendeu de inicio coa presenza no equipo titular de Arturo e Zalazar, case inéditos ao longo do campionato. A aposta saíulle ben, sobre todo polo perigo que xerou en ataque Alberto Quiles. O ex-xogador do Córdoba puido marcar nos minutos 5 e 10 e acertou no 26 ao rematar de cabeza un centro medido de Mario Soriano.
O Córdoba, nunha crise de resultados desde que comezou a segunda volta, buscou sen éxito a portería de Mackay.
A dinámica do partido cambiou de xeito radical na segunda parte. O Córdoba meteulle moita máis intensidade ao partido, comezou a xerar ocasións e marcou nun autogol de Jaime nunha acción embarullada.
Tentou tomarlle o pulso ao partido o Deportivo pero atopouse con moitos atrancos. O máis importante a perda de Quiles que sufriu unha dura entrada na faciana.
De aí ao final, poucas oportunidades e un empate que lle vale de pouco tanto ao Deportivo como ao Córdoba de Manuel Mosquera.
