Corea do Norte lanza dous mísiles de corto alcance ao Mar do Xapón

A tensión medra na península de Corea. Corea do Norte lanzou dous mísiles balísticos, nunhas probas que fixo a potencia nuclear fronte á costa oeste do Xapón. Os proxectís caeron en augas do Mar do Xapón tras percorrer 390 e 340 quilómetros, respectivamente.

Kim Yo-jong, a irmá do actual líder de Corea do Norte, advertiu de que o seu país pode converter o Pacífico nun campo de tiro. Díxoo despois de que os Estados Unidos fixeran exercicios aéreos na zona o domingo, con Corea do Sur e O Xapón. 

Esta acción dos aliados tivo lugar en resposta ao lanzamento dun mísil balístico intercontinental, o segundo con maior alcance potencial do seu arsenal, por parte de Corea do Norte o pasado sábado. O proxectil percorreu máis de 900 quilómetros antes de caer en augas da Zona Económica Especial do Xapón, ao oeste da illa de Hokkaido.

Os lanzamentos norcoreanos teñen lugar nun momento en que se ultiman as manobras regulares de primavera de Seúl e Washington, que esta semana teñen previsto realizar un exercicio teórico que simula, por primeira vez, un ataque nuclear norcoreano.

O pasado venres Piongyang prometeu unha "resposta sen precedentes" se os aliados levaban a cabo as súas manobras de primavera, chamadas Freedom shield, que o réxime cualificou de "preparativos para unha guerra de agresión".