Correos acepta preto de 63.000 solicitudes de voto por correo, un 18 % menos que no 2020

Correos admitiu preto de 63.000 solicitudes de voto por correo de cidadáns e cidadás que desexan exercer por este sistema o seu dereito ao voto nas eleccións ao Parlamento de Galicia que se celebrarán o 18 de febreiro.

Isto supón un 18,18 % menos respecto ás 76.794 solicitudes admitidas nas eleccións de 2020, durante a pandemia, informa a sociedade estatal nun comunicado. Para os comicios do próximo día 18 de febreiro, Correos recibiu 62.831 solicitudes de voto por correo, das cales, 45.653 presentáronse de forma presencial na rede de oficinas postais e 17.178 de forma telemática a través da súa web.

Tras comprobar a inscrición dos solicitantes no Censo, as delegacións provinciais da Oficina do Censo Electoral en Galicia seguen remitindo os envíos coa documentación electoral (certificado de inscrición no censo, sobres e papeletas de todas as candidaturas) á dirección facilitada polo elector na solicitude, con carácter certificado e urxente.

O Censo ten de prazo ata o día 11 de febreiro para facer entrega a Correos dos envíos, que seguirá poñéndoos a disposición dos cidadáns a medida que os reciba. A data de hoxe, Correos puxo á disposición dos electores 46.295 documentacións electorais para que poidan exercer o seu dereito ao voto.

O solicitante de voto por correo ten de prazo ata o xoves, 15 de febreiro, para depositar o sobre co seu voto en calquera oficina de Correos en toda España. Correos abrirá en Galicia durante os festivos do luns e martes de Entroido e do mércores de Cinza para facilitar as xestións do voto por correo. Deste xeito, abrirá de maneira extraordinaria 160 oficinas postais, a maioría de 09:00 a 13:00 horas. Abrirá outros 160 puntos de atención no rural que estarán operativos nos seus horarios habituais, aínda sendo festivo local nos seus municipios.