Sánchez agradece o traballo e o talante de Castells á fronte de Universidades

O presidente do Goberno Pedro Sánchez compareceu hoxe para confirmar o relevo de Manuel Castells á fronte do Ministerio de Universidades por motivos de saúde. 

"Quero agradecer o traballo e tamén a dedicación de Manuel Castells durante estes dous anos como ministro de Universidades", dixo Sánchez, que engadiu: "A admiración que xa sentía polo profesor Castells é aínda maior despois de velo traballar no Consello de Ministros".

O presidente destacou a visión cosmopolita da universidade e a ampla experiencia internacional do ministro saínte, que "enriqueceron sen dúbida a política universitaria do noso país".

Sánchez destacou que, en tempos difíciles pola pandemia, Castells promoveu "proxectos de enorme ambición e transcendencia", para o futuro, "non só mediante a redacción do anteproxecto de lei de universidades senón tamén co aumento das axudas e bolsas para universitarios e universitarias".

Tamén gabou "o seu talante, o bo ton e a capacidade de diálogo", e desexoulle éxito na súa nova etapa.

De Joan Subirats, Sánchez destacou o seu currículo, a súa experiencia docente e investigadora, e o seu "inxente labor académico", ao que, engadiu, se lle une a súa experiencia política no Concello de Barcelona.

"A súa presenza no Goberno vainos axudar a continuar con esa forma de facer política", dixo, que resumiu en "proximidade, empatía, diálogo e respecto, que deben seguir sendo as máximas do Goberno de España para que entre todas e todos logremos dignificar a actividade política e fortalecer as institucións democráticas, con boa educación, serenidade e responsabilidade".