Vídeos engadidos á causa das gravacións da Maruxaina poderían identificar os autores

Unha vintena de afectadas polas gravacións ilegais nas Festas da Maruxaina de 2019 prestaron declaración no Xulgado de Instrución número 1 de Viveiro. Fano por vez primeira, despois de que a Audiencia Provincial de Lugo ordenara a reapertura do caso.

Investígase a captación de imaxes dunhas 80 mulleres a ouriñaren na rúa en San Cibrao e a súa posterior publicación en páxinas pornográficas.

Paloma Maseda, voceira das denunciantes: "Por unha parte, estamos contentas porque nos están escoitando, pero por outro lado temos un sabor agridoce porque vai a cousa moi lenta. Cremos que poden adiantar bastante máis a investigación porque teñen moitos fíos polos que tirar".

Ylenia Hinestrosa, denunciante: "Tardouse moito en dar este paso, e creo que xa era hora. Seguramente haxa máis afectadas que non se recoñecesen nos vídeos ou que non fosen identificadas".

Segundo as denunciantes, acaban de engadir á causa uns vídeos recollidos nas Festas de San Cibrao en que se podería identificar os autores das gravacións. Neles sinalan que mesmo se aprecia como chegan a tocar as mulleres mentres manteñen relacións na praia.

Paloma Maseda, voceira das denunciantes: "Nós chegamos a estes vídeos, aos que pode chegar calquera persoa, en que se ven caras e se escoitan nomes. Agora estamos á espera de que a xente que ten que facer este tipo de traballo que o faga ben e consiga resultados".

Queda aínda por declarar parte das afectadas. Algunhas delas viven no estranxeiro, polo que previsiblemente o farán por videoconferencia.