Deixan armamento entre residuos para reciclar nun punto limpo de Cambre
Deixan armamento entre residuos para reciclar nun punto limpo de Cambre
Os portadores da bolsa deixaron nunha unha granada e unha caixa de cartuchos de pistola
A vivencia que tivo Víctor o último xoves de xuño rachou con vinte anos de rutina de traballo á fronte do punto limpo como encargado de mantemente no polígono Espírito Santo, en Cambre. Sucede cando estaba a rematar a xornada.
"Veume unha paisana duns 45 anos e un paisano duns 80 anos e pedíronme se lles podía recoller tres bolsas de lixo. Díxenlles que mas deixarán alí, que xa me encargaba eu (da clasificación dos materiais). O cartón foi para o cartón e o plástico ao seu lugar. E no fondo había unha granada e unha caixa de munición, creo que eran 40 cartuchos en total. Sorprendeume", di Víctor Nuñez, encargado do punto limpo.
Comunicou o feito á Policía Local e de inmediato chegaron especialistas en desactivación de explosivos. Acabaríase confirmando que a granada estaba desactivada. A Garda Civil tamén retirou os cartuchos.
"Pedíronme que recuperase todo o que había nas bolsas onde estaban os proxectís e a granada. Recupereino, fixeron fotos, pero unha vez que se largaron a min non me comunicaron nada".
Despois da sorpresa Víctor incide no obvio: o punto limpo non é un caixón de xastre dos residuos:
"Se meu pai deixa de estar activo na Garda Civil, o seu armamento entregaríao nun cuartel, non nun punto limpo.
-Unha granada non é obxecto como para ter na casa, non?
-Hai xente para todo. Hai xente para todo".
