Denuncian o mal estado que presenta a capela do Carme en Lugo

Dando un paseo polo adarve da muralla romana de Lugo chama a atención esta imaxe. A histórica capela do Carme presenta este estado. Estaban realizando tarefas de mellora, pero o presuposto das obras disparouse e a confraría á que pertence a capela parou todo. Agora as vigas de madeira están ao descuberto e a capela non para de sufrir as inclemencias do inverno.

As obras paralizáronse en verán e dende entón non se volveu actuar no templo. Ao longo destes meses a lona que facía de teito foise deteriorando e agora presenta numerosos buratos por onde non para de entrar a auga. Toda unha ameaza para esta capela pegada á muralla romana e ao pé do Camiño Primitivo.

"A tea rompe e ao romper a tea fai un burato e vai abrindo ata que xa non pode máis".

Os veciños están indignados con esta situación. Non entenden como poden deixar o templo peor do que estaba e lamentan os danos que se teñen que estar producindo no interior do templo e na súa estrutura.

"Dixeron que os santos e iso os sacaron de aí pero as pinturas e a madeira e todo quedará feito cascallos".

"É inconcibible que se poñan a traballar nela, que lle quiten o teito, que desmonten todo e que marchen. É incomprensible". 

Malia que na zona se arranxou a praza, os veciños lamentan o mal estado que presenta esta rúa situada no centro da cidade.

"Arranxaron todo isto pero dentro de arranxar é unha pena que despois vexas todo tal e como está. Ademais a capela é moi bonita por dentro e é unha pena".

"Ver esta zona é deprimente, as casas caendo e con problemas de ocupación ilegal".

Din que se trata dunha zona privilexiada pola súa localización, pero que pola contra dá unha pésima imaxe da cidade.