O Deportivo Abanca non dá a talla nun partido marcado en vermello (0-1)

O Deportivo Abanca perdeu un partido en que poñía moito en xogo. Enfrontábase ao Español, outro acabado de ascender, co que podía empatar na clasificación. A derrota (0-1) provoca todo o contrario, deixa o conxunto coruñés na zona baixa e saca da queima as españolistas. 

A primeira metade deixou unha das peores versións do Deportivo Abanca en toda a temporada. O Español tivo moitas ocasións claras de gol e o resultado de 0-1 foi o mellor que lles puido pasar ás de Irene Ferreras. A porteira Inés Pereira tivo un papel moi destacado e o gol marcouno a ex deportivista Ainoa Campo no minuto 37. 

⛔🧤 Inês Pereira.#DéporABANCARCDEFem #LigaF pic.twitter.com/fBNCvZJjU2

— Dépor ABANCA (@RCDeportivoFem) November 17, 2024

Na segunda metade meteu a adestradora a Henar e Olaya, pero as sensacións do Deportivo Abanca non cambiaron. Seguiu tendo o control do coiro pero con pouca profundidade. O Español defendía ben e buscaba o segundo gol. Chamorro e Carolina Marín volveron atopar a boa intervención de Inés Pereira. Así rematou o partido, cunha derrota que doe, pero merecida, do equipo deportivista.