Engala sen incidencias a Crew-9, que traerá de volta os astronautas da Starliner

A misión tripulada Crew-9 da NASA e SpaceX engalou sen incidencias este sábado dende Florida (nos EUA), rumbo á Estación Espacial Internacional (EEI), para traer de volta á Terra en febreiro de 2025 os dous astronautas atrapados na estación orbital.

A nave Dragon de SpaceX partiu ás 13:17 horas desde o Complexo 40 da Estación da Forza Espacial de Cabo Cañaveral, despois dun terceiro e último atraso provocado polo furacán Helene, con dous tripulantes en lugar dos catro habituais, o que deixa dous asentos baleiros.

Prevese que a Crew-9 se axuste á EEI o domingo pola tarde. A misión leva a bordo o seu comandante, o astronauta da NASA Nick Hague, e o cosmonauta da axencia rusa Roscosmos Aleksandr Gorbunov, especialista da misión.

Os dous asentos libres, aos que renunciaron outros dous astronautas, ocuparanos á súa volta Barry 'Butch' Wilmore e Sunita 'Suni' Williams, da cápsula Starliner de Boeing atrapados na estación internacional.

Wilmore e Williams ían pasar pouco máis dunha semana na EEI, a onde chegaron en xuño, pero tras problemas técnicos do aparello que non puideron resolverse, a NASA decidiu o 6 de setembro que quedaran no espazo ata que regrese a Dragon, en febreiro.

A misión da NASA e SpaceX ía despegar este pasado xoves, pero tivo que pospoñerse debido ao furacán Helene, que tocou terra esa noite no noroeste de Florida cunha categoría de forza 4.

É o terceiro intento no lanzamento da Crew-9, xa que a primeira misión, que estaba programada para o pasado 18 de agosto, tivo que se atrasar debido ao problemático regreso da que foi a primeira misión tripulada da Starliner.

Os dous ocupantes da Crew-9, a novena misión operativa de voos tripulados a bordo da Dragon por encargo da NASA, permanecerán uns cinco meses no laboratorio orbital efectuando investigacións.

Investigacións

Os astronautas Hague e Gorbunov sumaranse á expedición na EEI, que está comandada por Williams, e realizarán as investigacións e estudos en curso sobre a coagulación sanguínea, os efectos da humidade en plantas cultivadas no espazo e os cambios na visión dos astronautas.