Deteñen un home en Vigo como suposto autor dunha agresión sexual nun aparcadoiro
Deteñen un home en Vigo como suposto autor dunha agresión sexual nun aparcadoiro
Unha amiga da vítima foi a que alertou as forzas de seguridade
O arrestado negou a agresión e asegurou que as relacións sexuais foron consentidas
A Policía Local de Vigo detivo nas últimas horas un home por unha suposta agresión sexual a unha muller nun aparcadoiro da cidade.
Sucedeu este xoves sobre as 8 da tarde. Segundo fontes policiais, os feitos tiveron lugar nos sotos dun aparcamento situado xunto aos antigos xulgados da rúa Lalín. Foi unha amiga da vítima a que alertou as forzas de seguridade despois de que a muller lle contara o que lle acababa de ocorrer.
O home investigado e a victima son novas, pero maiores de idade, ao redor dos 20 anos. Os feitos que se investigan producíronse no interior do aparcamento, pero fóra dos vehículos. O establecemento dispón de cámaras de seguridade cuxas imaxes poderían ser determinantes na investigación.
A Policía Local de Vigo acudiu ao lugar para atender a agredida e tamén para recoller testemuñas e buscar o presunto agresor, que marchara do lugar. Pouco despois era arrestado.
Na súa declaración o home negou que atacase sexualmente a muller e insistiu en que mantivo relacións con ela de forma consentida. Posteriormente foi trasladado á comisaría da Policía Nacional de Vigo, onde pasou a noite, pendente do paso a disposición xudicial.
Mentres, a vítima foi examinada no Hospital Álvaro Cunqueiro conforme o protocolo que existe para este tipo de delitos.
