Detidas tres persoas en Lugo acusadas de estafar vendendo falsos billetes premiados de lotería
Detidas tres persoas en Lugo acusadas de estafar vendendo falsos billetes premiados de lotería
A voz de alarma deuna unha cidadá de Lugo, que ía ser vítima da estafa e que chamou inmediatamente ao 091, comunicando o feito
A Policía Nacional detivo en Lugo tres persoas, integrantes do Clan San Segundo, acusados de realizar varias estafas coa estafa do 'tocomocho', consistente en vender falsos billetes premiados de Lotería.
Tal e como apunta a policía, neste calote os estafadores enganan a vítima con lotería ou cupóns que presuntamente están premiados. O gancho, mostrando algún tipo de discapacidade física ou psíquica, ofrece estes boletos a un prezo moi inferior ao premio, mentres que outro membro do clan fai o intento de adquirilos para enganar a vítima e que este achegue diñeiro ou xoias para facerse cos cupóns falsos.
A voz de alarma deuna unha cidadá de Lugo, que ía ser vítima da estafa e que chamou inmediatamente á sala do 091, comunicando o feito. Os axentes puxeron entón en marcha un dispositivo para dar cos autores, que este ano realizaran catro estafas na cidade por un valor de varios miles de euros.
Froito deste operativo, a policía interceptou o vehículo onde se trasladaban os autores das estafas. No seu poder atopáronse máis de 500 euros en metálico, xoias, sobres con emblemas de entidades bancarias, cartolinas e papeis para simular diñeiro, así como cupóns e boletos de lotería caducados e non premiados que servían de reclamo para as estafas.
