Diego Calvo: "Se lle volven preguntar ao ministro para a semana, igual estamos en 8.000 millóns pola AP-9"

O conselleiro da Presidencia, Xustiza e Deportes, Diego Calvo,  insiste na Radio Galega na reclamación da transferencia da AP-9 a Galicia e da súa gratuidade. Nunha entrevista no Galicia por diante fin de semana. 

Calvo di confiar en que os socialistas galegos axuden a que o Goberno central acceda agora ao traspaso da autoestrada do Atlántico, ao tempo tira de retranca para avaliar o baile de cifras ofrecido nas últimas semanas polo ministro de Transportes, Óscar Puente, á hora de taxar un eventual rescate da autoestrada.

"Eu estaba presente cando o ministro cambiou a cifra. A principios de semana eran 4.000 (millóns), despois 6.000 e se lle volven preguntar para a semana que vén, igual estamos en 8.000. A min gustaríame pensar que efectivamente imos ser capaces e que o Partido Socialista en Galicia vai conseguir que o Goberno vote a transferencia. Creo que iso non implica tantos cartos e se temos a transferencia cos recursos necesarios para poder xestionala haberá tempo para poder falar dos seguintes pasos". 

O conselleiro da Presidencia lanzou dobre crítica aos dous partidos da oposición en Galicia a conta da súa actitude sobre a AP-9. Aos socialistas lémbralles que foi "o candidato" do Partido Socialista en Galicia quen dixo que "a AP-9 tiña que ser gratuíta". Para Calvo, o PSdeG é "sucursal" do Goberno e "está perdido".

Sobre o Bloque Nacionalista Galego, Calvo aponlle que en Madrid "non fai valer o seu peso en Galicia nos concellos e nas Deputacións" e que o Partido Socialista "se ri constantemente durante anos do Bloque Nacionalista Galego". 

Corredor Atlántico Noroeste

Na conversa, o conselleiro de Presidencia avanzou que neste mes de xuño está previsto que se reúna co comisionado do Goberno para o Corredor Atlántico Noroeste Ferroviario de Mercadorías. Segundo explicou Calvo, o venres en Lugo coincidiu con José Antonio Sebastián Ruiz e quedaron e fixar data para abordar obras, prazos e orzamentos deste nó ferroviario.

Segundo Calvo, na presentación que houbo na Coruña "non quedou claro nada" e "daba a sensación de que se mesturaban tramos e obras que non tiñen que ver co Corredor".

"Se non é esta semana, a seguinte, pero no mes de xuño poder manter unha reunión para esclarecer moitos dos plans que ten pensado facer o Ministerio".

Para Calvo, esta reunión será "o primeiro paso para que as cousas empecen a funcionar". 

Besteiro antepón a gratuidade á transferencia

O líder dos socialistas galegos considera que á cidadanía lle preocupa máis a gratuidade da autoestrada que a cesión da  titularidade.

"Se me dan a elixir entre gratuidade e transferencia, eu quedo coa gratuidade".

Segundo José Ramón Gómez Besteiro, que o tema sexa complexo "non quere dicir que sexa imposible" e asegura que hai previsión de aumentar as bonificacións actuais do 50 %. 

Sen renunciar a reclamar a competencia da AP-9, pídelle ao PP e ao BNG que apoien uns orzamentos xerais do estado que inclúan bonificacións do 75 % das peaxes.