Dimite a conselleira asturiana de Industria polo accidente mineiro de Zarréu
Belarmina Díaz presentou a súa dimisión irrevogable ao presidente do Principado dúas semanas despois do accidente qu e lle custou a vida a cinco traballadores
A conselleira acusa a PP e Vox de "utilizar politicamente" o accidente: "A vostedes non lles importa por que se produciu a explosión, tan só lles interesa exercer un ataque permanente e persoal contra a miña persoa"
Arquivo/Carlos Castro/Europa Press
A conselleira asturiana de Transición Ecolóxica, Industria e Comercio, anunciou este martes a súa "dimisión irrevogable". Fíxoo nunha comparecencia no pleno da Xunta Xeral do Principado para informar do accidente do 31 de marzo na mina asturiana de Zarréu que lle custou a vida a cinco mineiros e deixou outros catro feridos.
A conselleira sinalou que presentou onte pola tarde a súa dimisión ao presidente do Principado, Adrián Barbón, a quen agradeceu a confianza que depositou nela para o cargo que ocupaba desde o pasado mes de febreiro.
Sinalou que se aceptou asumir esa responsabilidade foi porque "quería traballar por e para Asturias", e acusou a PP e a Vox de "utilizar politicamente" o accidente en lugar de centrarse en coñecer o que ocorreu de verdade.
"A vostedes non lles importa por que se produciu a explosión de grisú de Blue Solving, non lles importa. Tan só lles interesa exercer un ataque permanente e persoal contra a miña persoa, que nin eu nin a miña familia merecemos", engadiu.
A conselleira explicou que este luns presentou a súa dimisión irrevogable ao presidente do Goberno de Asturias, Adrián Barbón, que estaba presente no pleno. "Grazas, presidente, por confiar en min, pero, como ben sabes, eu aceptei o cargo de conselleira para traballar por e para Asturias. Desde o accidente o meu único obxectivo era investigación, verdade e xustiza, e teño claro que en ningún caso vou ser un obstáculo para a investigación, nin para coñecer a verdade, nin para que se faga xustiza", díxolle ao presidente asturiano.
Belarmina Díaz levaba dous meses no cargo. Sucedeu a Nieves Roqueñí, que preside agora o Porto de Xixón.
Nada en 1968 en Astorga (León), Belarmina Díaz é enxeñeira de Minas pola Universidade de Oviedo, doutora en Enxeñería de Minas pola Universidade de Oviedo e Máster en Avaliación de Impacto Ambiental, polo Instituto de Investigacións Ecolóxicas de Málaga.
Desde xuño do 2017 ata febreiro de 2025 foi directora xeral do Goberno do Principado de Asturias.
