O PSOE amplía a vantaxe sobre o PP a 6,5 puntos, segundo o CIS
Os dous partidos maioritarios perden apoios respecto ao mes anterior: un 32,6 % para o PSOE e un 26,1 % para o PP
Vox alcanza o seu mellor resultado neste estudo de opinión: un 15,2 %
O CIS dálle ao BNG unha intención de voto do 0,8 %
Pedro Sánchez e Alberto Núñez Feijóo na Moncloa (EFE/Sergio Pérez)
O PSOE mantense na cabeza en estimación de voto e amplía a súa distancia sobre o PP ata 6,5 puntos, segundo o barómetro de abril do Centro de Investigacións Sociolóxicas (CIS), que mostra que cae o apoio a ambos os partidos mentres se dispara o apoio a Vox.
A enquisa, cunha mostra de 4.009 entrevistas e realizada do 1 ao 8 de abril, outorga unha estimación de voto do 32,6 % ao PSOE (1,9 puntos menos que en marzo); e do de 26,1 % ao PP (3,1 puntos menos).
Aínda que a enquisa se fixo en plena guerra comercial polos aranceis de Donald Trump, quen se dispara é Vox, que alcanza o 15,2 %, o seu récord nas enquisas do CIS. O mes anterior, cando o presidente estadounidense empezaba a anunciar as súas primeiras medidas, os de Abascal marcaran o seu mínimo histórico.
En cuarto lugar repite Sumar, cun 6,2% o seu peor dato desde as xerais de 2023, e axéxao Podemos, cun 4%. Pola súa banda, o partido do eurodeputado Luis 'Alvise' Pérez repite no 1,9 %.
No caso dos partidos nacionalistas, o CIS dá unha intención de voto do 0,8 % ao BNG, un 1,9 % a ERC, un 1,7 % a Junts, un 1,1 % a EH Bildu e un 0,7 % ao PNV.
