Dimite a presidenta de Hungría, Katalin Novak, tras conceder un indulto polémico

Este sábado a presidenta de Hungría, Katalin Novak, moi próxima ao primeiro ministro ultranacionalista Viktor Orbán, anunciou a súa dimisión tras unha semana de controversia por un indulto que concedeu a un directivo dun fogar infantil que tentou ocultar casos de pederastia.

"Pido perdón a aqueles a quen ferín. Hoxe falo por última vez cara a vostedes como presidenta. Dimito do meu cargo", dixo Novak nun vídeo emitido pola televisión pública, tras volver antes de tempo dunha visita a Qatar.

A xefa de Estado, exministra de Asuntos da Familia, recoñeceu cometer "un erro" ao indultar o director adxunto dun fogar infantil, que abusou durante anos de varios menores. Pouco despois do anuncio, a exministra de Xustiza, Judit Varga, que asinara o ano pasado o polémico indulto, anunciou que se retira da política.

"Asumo a responsabilidade política por asinar o indulto. Retírome da vida pública", anunciou a antiga responsable de Xustiza, tamén moi próxima a Orbán.

Varga engadiu que tamén abandonará o Parlamento húngaro e non liderará a lista do gobernante partido Fidesz nas eleccións europeas de xuño, como estaba previsto.

O polémico indulto, concedido en abril de 2023 con motivo da visita do papa Francisco a Budapest, foi descuberto pola prensa a semana pasada.

A partir dese momento, organizacións e partidos políticos opositores pediron a dimisión da presidenta, xa que consideraron ese indulto como "inaceptable".

En resposta, Orbán propuxo esta semana unha emenda constitucional que prohibiría no futuro os indultos a condenados por crimes contra nenos, o que moitos interpretaron como unha crítica indirecta á decisión de Novak e Varga.

O pasado venres pola tarde milleiros de húngaros pediron diante da sede da presidencia no Castelo de Buda, a dimisión de Novak, xa que non a consideraban digna de ocupar o cargo. Este posto ten atributos principalmente representativos, aínda que tamén inclúe firmar indultos de presos a proposta do Goberno.